21. Nóvember, 2009
“Jóhanna segir sjálfstæðismenn haldna þráhyggju”
Þetta á að vera málefnalegt innlegg forsætisráðherra í umræður um hvernig við Íslendingar getum unnið okkur út úr kreppunni. Við sjálfstæðismenn höfum aftur og aftur bent á að það er glapræði að hækka skatta við þær aðstæður sem eru uppi á Íslandi. Skattahækkun nú mun auka enn á samdráttinn og gera vanda þjóðarbúsins erfiðari á næstu árum. Rétt er að hafa í huga að það voru röng viðbrögð bandarískra stjórnvalda sem gerðu kreppuna sem hófst 1929 miklu alvarlegri en hefði þurft að verða. Ríkisstjórn Jóhönnu er að gera sambærileg mistök.
Sjálfstæðisflokkurinn hefur bent á leið til að leysa vanda ríkissjóðs án þess að grípa til skattahækkana. Þessi leið hreyfir ekkert við almenna lífeyrissjóðskerfinu, hún snýr eingöngu að séreignarsparnaðinum. Staða þeirra sem eiga séreignarsparnaðinn verður óbreytt, ríkið er einungis að taka út peninga sem það á í þessum sparnaði.
Það er sennilega rétt hjá Jóhönnu að við erum haldin þráhyggju. Hver er sú þráhyggja? Að vilja gera allt sem mögulegt er til að gera þjóðinni mögulegt að vinna sig út úr kreppunni, koma í veg fyrir gjaldþrot heimila og fyrirtækja, tryggja að hér verði sköpuð verðmæti til að standa undir þeirri samfélagsþjónustu sem við viljum tryggja að allir eigi aðgang, að hér festist atvinnuleysi ekki í sessi og að Ísland verði áfram í hópi þeirra landa sem bjóða íbúum sínum hvað best lífskjör. Skattahækkanir ofan í samdrátt í útgjöldum hins opinbera ofan í samdrátt vegna hrunsins ganga þvert á þessa þráhyggju okkar. Skattahækkanir á fjölskyldur sem hafa mátt þola launalækkun, hækkun lána, lækkun á húsnæðisverði og samdrátt í kaupmætti ganga þvert á þessa þráhyggju okkar sjálfstæðismanna.
Skattahækkanir Jóhönnu eru þráhyggja, en það er önnur þráhyggja en sú sem við í Sjálfstæðisflokknum erum haldin.
Senda á Facebook
